6 افكار لمشروع براس مال 500 جنيه ( 2024 )

ممكن تفكر ان بدء مشروع براس مال 500 جنيه حاجة مش منطقية….

لكن علي الرغم من ان مبلغ زي ده قليل جدا الا انه ممكن تبدأ بيه اكتر من مشروع مربح جدا.

حتي المبالغ الاقل زي 200 جنيه تقدر تبدأ بيها وده اتكلمنا عنه.

هنا في الموضوع ده خليني اساعدك واقدملك شوية افكار ممكن تلاقي فيهم الفكرة المناسبة ليك.

وعلشان المقدمة متبقاش طويلة ومملة خلينا نروح بسرعة علي…

افضل مشاريع براس مال 500 جنيه في مصر

في حاجة كمان نسيت اقولهالك….

في الغالب هيكون المبلغ ده ممتاز علشان تبدأ بيه مشروع الكتروني علي الانترنت.

علشان كدا هتلاقي مجموعة من المشاريع التقدر تعملها علي ارض الواقع ومجموعة تقدر تبدأها اونلاين.

اهم حاجة ان كل المشاريع دي هتكون بسيطة ومش محتاجة مهارات ضخمة فتقدر تبدأها علطول من دلوقتي.

لو محتاج تعرف فدي: اكتر الاستثمارات المربحة في مصر

1- مشروع تربية طيور

احسن بداية لمشروع بـ 500 جنيه هي من خلال تربية الطيور المختلفة.

تبعا لخبرتي الشخصية تربية الحمام هي اقل حاجة من حيث المخاطر، لكن الارباح فيها مش كبيرة.

ممكن برضو تستغل فلوسك في مشروع تربية الفراخ البيضاء وهو طبعا معروف انه مشروع مربح ومميز.

هنا المشروع هيحتاج منك حاجات بسيطة علشان تقدر تبدأ وهي:

• مكان مناسب للمشروع او لنوع الطيور وده طبعا هيبقي في بيتك.
• تحدد العدد المناسب علشان تبدأ فمثلا لو حمام هتبدأ بحوالي 6.
• بعد كدا محتاج تبدأ تشوف الاكل المناسب وتشتريه.

دورة حياة الفراخ البيضاء سريعة لكن المخاطرة فيها كبيرة نوعا ما.

اما بقي لو بنتكلم عن الحمام فدورة حياته وانتاجه لحمام جديد بتبقي اطول حوالي 3 شهور لكن المخاطرة اقل والانتاج كويس.

ممكن يفيدك:

• افضل مشاريع صغيرة في مصر
• مشروع ربح يومي من المنزل
• مشروع مربح للرجال من المنزل
• مشروع مميز براس مال 3000 جنيه

2- مشروع مدونة الكترونية

لو حابب بقي تبدأ مشروع الكتروني مش علي ارض الواقع فالخيار القدامك والبنصحك تبدأ بيه هو المدونات

تقريبا بذكر المدونات في كل موضوع عن المشاريع، ودي مش مبالغة لكن لانها فعلا ينفع تبدأها بأي راس مال.

500 جنيه مبلغ كويس علشان تبدأ مدونة وردبريس، لكن الامكانيات هتكون ضعيفة نوعا ما.

هنا هتقدر تكسب فلوس عن طريق اكتر من طريقة زي: 

• الاعنات الهتعرضها علي المقالات الموجودة علي مدونتك.
• تقدر تسوق منتجات وتاخد عمولة علي اي حد يشتري.
• تقدر كمان تبيع منتجاتك الخاصة سواء ( منتجات بتتمسك بالايد او كورسات او كتب الكترونية ).
• طبعا تقدر تعمل اشتراك مدفوع لمحتوي مميز عندك.
• وغيرها من الطرق.

طيب تقدر تبدأ ازاي؟

فيه موضوع اتكلمت فيه عن ازاي تعمل مدونة ممكن تقراه وتستفيد منه.

لكن بشكل عام ممكن برضو الخص الموضوع ليك واقولك انك هتحتاج:

• استضافة لموقعك وهنا الانسب بالميزانية دي استضافة Hostinger
• دومين للموقع ( وده عنوان موقعك علي الانترنت ) وتقريبا اول سنة تقدر تشتريه بـ 30 جنيه من Namecheap.
• بعدها هتتعلم ازاي تكتب مقال كويس وتبدأ تكتب مقالات بشكل مستمر.
• هتتعلم كمان تشوف عدد الزيارات البتجيلك علي المقالات وازاي تستغل ده.
• اخبرا بقي هتبتدي تستغل الزيارات البتجيلك دي بأنك تقدم علي برنامج Adsense وتبدأ تضيف اعلانات او تضيف منتجات ترشحها لجمهورك وتاخد عمولة لما يشتروا.

3- مشروع منتجات هاند ميد

منتجات الهاند ميد من المشاريع الصغيرة المميزة جدا في مصر وخصوصا للبنات.

علشان كدا لو معاكي 500 جنيه وعندك هواية انك تعملي حاجات بأيديكي ممكن تبدئي المشروع ده بشكل بسيط وسريع جدا.

ممكن يكون مش عندك مهارة انك تبدئي بس مين دلوقتي مش هيلاقي المحتاجه علي اليوتيوب؟؟؟

الموضوع مناسب اكتر للبنات من الشباب، وده ببساطة لان المنتجات المطلوبة هي: 

• الحظاظات
• السلاسل
• المجات
• الحلقان
• الخواتم.

وعلشان كدا دايما البنات مميزة في الحتة دي.

لكن اكيد كشاب تقدر تستغل مشروع زي ده بأنك تشوف البنات الكويسة في الهاند ميد وتبدأ تتفق معاهم علي انك تسوقلهم وتاخد منهم بسرع اقل من السعر البيبيعوا بيه.

وبكدا الكل كسبان.

ممكن يفيدك: افضل افكار مشاريع مربحة بـ 1000 جنيه

4- مشروع تعبئة عطور

اتكلمت عن المشروع ده مرة وهتكلم عنه تاني.

تقدر تستغل مبلغ صغير جدا فأنك تعمل عينات من عطور مختلفة وتقدر تبدأ تبيعهم كعينات بسيطة.

• سعر الـ 100 مل عطور في الغالب حوالي 100 جنيه ( اكيد مش بنتكلم هنا عن براندات كبيرة زي ماء الذهب ).
• هتشتري 8 انواع عطور مختلفة كل نوع 50 مل ( يعني كدا 400 جنيه )
• بعدها هنشتري 40 زجاجة بتشيل 10 مل ونملاها كلها.
• هنبيع العنية دي بـ 15 جنيه.
• بما اننا هنعمل حوالي 40 عينة وهنبيعها بـ 15 جنيه ( فالاجمالي هيكون 600 جنيه ).
• كدا المكسب الصافي للمشروع هيكون 20 %.
• تقدر تعيد العملية دي وتستغل الربح في تكبير المشروع وشراء عينات مختلفة في الحجم.

لو عاوز رائي فده يعتبر مشروع تجاري صغير ومميز جدا في مصر.

5- مشروع صفحة لتسويق المنتجات بالعمولة

تاني مشروع الكتروني في القائمة بتاعتنا هو صفحة الفيس بوك.

تقدر طبعا تعمل صفحة فيس بوك من غير ما تدفع اي حاجة، لكن هنا مش بنتكلم عن صفحة عادي دي صفحة تسويق.

وبالتالي الـ 500 جنيه هتكون تكلفة الاعلانات الهنستخدمها في التسويق لمنتجات معينة.

هنا الموضوع فيه مخاطرة اكتر بكتيير من المدونة!!!

وده طبعا علشان هنا انت مش ضامن اطلاقا هي الاعلان هينجح ولا لا.

علشان كدا خطواتك في المشروع ده لازم تكون كالتالي: 

• تتعلم ازاي تعمل اعلان ناجح علي فيس بوك.
• تتعلم ازاي تختار منتج مميز وبياع.
• ترجع تتعلم تاني ازاي تستهدف صح العملاء وتعيد استهدافهم.
• بعدها تبدأ تجرب بمبلغ صغير الاعلانات وهل هتنجح في الاخر ولا لا.
• لو نجحت ولقيت فيه عمولات كويسة ارجع استغل تاني الفلوس الجاتلك وزود الحملات وضاعف ربحك.

ملحوظة: الموضوع هنا صعب ومحتاج منك انك تقدر تخاطر، فلو مش هتقدر تخاطر بالمبلغ ده بلاش تدخل في الدوامة دي من الاساس.

اتكلمت بالتفصيل عن المجال ده في: كورس التسويق بالعمولة المجاني تقدر تتعرف علي كل حاجة فيه من الرابط الي فات.

6- مشروع المخلل المنزلي

معظم المواقع تقريبا بتتكلم عن مشروع المخلل وكأنه احسن مشروع براس مال 500 جنيه.

وعلي الرغم من ده انا فعلا مش شايف كدا!!!

علشان كدا قررت اسيب المشروع ده للاخر…

هنا انت المفروض تعمل ايه؟

• هتجيب الخامات ( جزر – ليفت – بصل – خيار – قرنبيط – زيتون – ليمون – وغيرها ).
• وبعدها هتبدأ تخلل ده في البيت وتنضفه بشكل كويس جدا.
• بعدها المفروض انك تبدأ تغلف المنتج بتاعك وتبيعه طبعا صح؟

لا في الحقيقة انا مش شايف ان دي الطريقة الانسب انك تبيع منتجك لو هتدخل في المشروع ده….

طيب تعمل ايه؟

في الغالب المخلل المنزلي مش بيتباع في محلات البقالة لان انواع كتيير جاهزة ظهرت….

علشان كدا انسب مكان تبيع فيه منتجك هو:

• مطاعم الفول والفلافل.

في الغالب اغلب المطاعم في المناطق الشعبية بتستخدم المخلل المنزلي.

علشان كدا لو بدأت تروح للمحلات دي وتوريهم المخلل بتاعك وتبيعلهم بسعر كويس هتقدر انك تبيع وتلاقي دخل.

غير كدا الفرص قليلة الا لو كان منتجك ممتاز.

دي كانت احسن افكار ممكن تستغل فيها 500 جنيه علشان تعمل مشروع.

دلوقتي قولي…

انت شايف ايه احسن مشروع وانسب واحد ليك؟

حابب تبدأ مصنع مخلل منزلي؟ ولا شايف تربية الطيور احسن؟ ولا شايفة انك ممكن تعملي منتجات هاند ميد ممتازة؟

ايا كان اختيارك هيبسطنا جدا انك تشاركنا بيه هو او اي سؤال عندك.

بالتوفيق.

عن الكاتب

Mahmoud

أجمع بين الخبرة المالية والتجربة العملية حصيلة أكثر من ١٥ سنة من الخبرة لأقدم نصائح عملية لتحقيق الحرية المالية. تتخطى مقالاتي تعقيدات العالم المالي، مقدمةً رؤى واضحة وقابلة للتنفيذ لتحقيق الارباح والنمو الاقتصادي. انضم إليّ في استكشاف استراتيجيات فعالة للنجاح المالي.

See author's posts