محتاج مشروع مربح جدا براس مال 10000 جنيه؟
ومين فينا مش محتاج في وقت بقت الوظيفة فيه اخر خيار المفروض انك تلجأ ليه؟
في مصر مبلغ 10 الاف جنيه مش كبير وفي الحقيقة مش صغير برضو بس انك تلاقي افكار لمشاريع بالتكلفة دي صعب شويتين ولا ايه؟
علشان كدا في الموضوع ده هكلمك عن افكار مميزة وواقعية تقدر من خلالها تستغل المبلغ ده..
والاهم من ده انها مجربة ومربحة فعلا ومش افكار مكررة من مواقع تانية.
لكن هتحتاج منك دراسة وتخطيط كويس لكل فكرة، لانها افكار مش خطوات عملية.
ودلوقتي لو مستعد خلينا نبدأ بسرعة ونتعرف علي….
12 فكرة مشروع مربح جدا براس مال 10000 جنيه
اهم حاجة في المشاريع دي انها قابلة للتنفيذ…
يعني انت مش محتاج تكون خبير او محترف علشان تبدأ اي مشروع فيهم، انا استبعدت كل الافكار دي.
وعلشان الاون لاين المجال الافضل في الفترة الحالية هتلاقي تركيزنا الاكبر علي المشاريع علي الانترنت.
لكن ده مش معناه خالص ان مفيش مشاريع علي ارض الواقع….
تمام؟ نبدأ يعني بالمشروع الاول؟
شكلك مستعد خليني اقولك المشروع الاول والمفضل ليا دايما وهو…
يمكن يعجبك:
1- مشروع مدونة ميكرونيتش احترافية
- يعني ايه مدونة؟
المدونة هي موقع محتوي زي البتقرأ فيه الموضوع ده بالظبط.
- طيب يعني ايه ميكرونيتش؟
يعني متخصصة جامد في حاجة معينة، هنا مثلا احنا بنتكلم عن كل الطرق الممكن تجيب منها فلوس يبقي دي اسمها نيتش Niche.
لكن لو بنتكلم عن المشاريع بس، تبقي اسمها ميني نيتش Mini niche.
طيب لو بنتكلم عن المشاريع في مصر بس هنا بقي يبقي اسمها ميكرو نيتش
- ليه مدونة بالشكل ده؟
لانها اسهل من حيث البدء وهتبقي مركزة اكتر فهتقدر انك تحدد الطرق الهتجيب بيها فلوس منها وكمان هتصرف عليها اقل من المدونات النيتش.
كمان لانها من المشاريع الي مش محتاجه تفرغ، وبالتالي تقدر تشتغل او حتي تبدأ مشروع تاني بجانبها.
- طيب التكلفة هتكون كام تقريبا؟
في الغالب المدونات دي مش هتكلفك اي حاجة، لكن علشان تبقي مشروع مربح جدا لازم تبقي احترافية، وعلشان كدا هتحتاج تكلفة مبدئية حوالي 300 دولار يعني تقريبا 9000 جنيه او اقل حاجة بسيطة.
لو محتاج طبعا تعرف اكتر عن المدونات وازاي تبدأ واحدة بالتفصيل فانا عملت دليل عن ازاي تبدأ مدونة وتعمل منها فلوس.
انصحك جدا تقراه بعمق كدا وتنفذ الموجود فيه.
- طيب هتعمل فلوس ازاي؟
فيه طرق كتيير تقدر تعمل فلوس من مدونتك عن طريقها، لكن من رائي الشخصي وعن تجربة انسب طريقة لمدونات الميكرو نيتش هي التسويق بالعمولة.
وانا جمعتلك اغلي برامج الافلييت في موضوع وافضل مواقع الافلييت في موضوع تاني تقدر تنضم للمناسب للمجال الهتقرر تبدأ فيه.
2- مشروع قناة كاش كاو
تاني افضل مشروع اون لاين براس مال عشرة الاف جنيه هو قنوات الكاش كاو.
وهي طريقة من خلالها تقدر تعمل فلوس من اليوتيوب بدون ظهور.
- ايه هي قنوات الكاش كاو؟
قنوات بيتم من خلالها نشر معلومات بدون ظهور شخص متكلم، ومن اشهر امثلتها قنوات ( هل تعلم – اخضر – قنوات التحفيز – قنوات افضل 10 – وغيرها ).
- ليه سموها كاش كاو؟
لانها مشروع ارباحه مستمرة، تقدر تستثمر فيه وتاخد الارباح منه وتبدأ في استثمارها في مشاريع تانية.
- هل القنوات دي مربحة؟
في الحقيقة هي مربحة جدا، وخصوصا لو قدرت تستهدف اجانب، وعلشان كدا بنصح دايما انك تستثمر في فيديوهات اجنبية، ولكن علي الرغم من كدا الفيديوهات العربية برضو مربحة.
- طيب التكلفة هتكون كام؟
في البداية احنا محتاجين علي القناة:
علي الاقل 10 فيديوهات وده تكلفته لو عربي تقريبا 100 دولار يعني حوالي ( 1850 جنيه )، ولو اجنبي هتبقي تقريبا الضعف.
بعدها هنحتاج نعمل اعلانات بقيمة 100 دولار ( 3 دولار يوميا ) لو القناة عربية، و الضعف لو قناة اجنبية وهنستهدف اعلانات البحث.
بعدها هنحتاج 5 فيديوهات شهريا بمجرد وصول القناة الي 1000 مشترك او اكثر وهنا التكلفة 50 – 100 دولار لمدة 3 شهور.
كدا الاجمالي 1850 + 1850 + 2700 يعني تقريبا 6400 جنيه مصري للقناة العربية، وبالتالي حوالي 12 الف جنيه للقناة الاجنبية.
- طيب هتعمل فلوس ازاي؟
السر فأستهداف المحتوي الاكثر استهلاكا.
بمعني فيديوهات التحفيز من اكتر الفيديوهات مشاهدة في المحتوي العربي والاجنبي، فيديوهات اغني 10 في العالم وكل ما هو متعلق بحياة المليونيرات فيديوهات ممتازة في عدد المشاهدات، فيديوهات الغرائب فيديوهات Viral تنتشر بسرعة رهيبة.
تركيزنا في كل الفيديوهات دي علي عدد المشاهدات وانها تزيد علي قد منقدر.
طب ده ليه؟
علشان الطريقة الانسب للربح من قنوات الكاش كاو هي عن طريق اعلانات اليوتيوب وده هدفنا.
3- مشروع محل منزلي لبيع الملابس
اهم حاجة في المشروع ده كالعادة هي التخصص.
لان راس المال بتاعك قليل، لازم تفكر بطريقة اقتصادية ومختلفة.
لو قررت تبدأ محل لبيع الملابس في اكتر من مجال في نفس الوقت هتشتري قطع قليلة وموديلات قليلة من كل نوع.
لكن لو قررت مثلا تبدأ بملابس البيت الشبابي بس؟ تفتكر هتقدر تجيب كمية قد ايه؟
المميز جدا هنا برضو انك علي حسب انت شاب او بنت تقدر تختار المنتج المناسب ليك، وتبدأ كمان تسوقه علي جروبات فيس بوك او حتي تعمل اعلانات ممولة لصفحة خاصة بيك وتبدأ توصل للزبائن.
هنا التكلفة هتكون بسيطة علشان كدا بنصحك تفكر فالمشروع ده بس تختار الملابس المناسبة للموسم.
نصيحة اضافية: ركز علي منتجات البنات هي التقدر تبيعها اكتر واسرع.
4- مشروع عربة ايس كريم
من المشروعات الصغيرة المميزة التي يمكنك البدء بها في مصر بـ اقل من 10 الاف جنيه هي عربة الايس كريم.
المشروع بسيط ومميز خصوصا في فترة الصيف.
اهم حاجة في المشروع ده انك تختار مكان مناسب ويفضل مكان علي كورنيش او في منطقة سكنية.
كمان لازم جدا تركز في انك تصمم عربية مميزة بشكل مميز.
هنا تقريبا تكلفة العربية حوالي 5000 جنيه والخامات تقريبا 5000 زيهم علشان كدا البداية هنا سهلة.
تقدر كمان تصمم العربية بحيث انك تغير النشاط في فترة الشتاء لعربية حمص الشام مثلا.
5- مشروع تربية دواجن
اي مشروع فيه تربية اي حاجة حية في الغالب بتكون المخاطرة فيها اعلي.
لكن…
الربح من المشروع هنا بيكون في الغالب كويس واحيانا اكتر من نصف راس المال.
المميز كمان هنا ان دورة حياة المشروع بسيطة في الغالب 45 يوم وبعدها تقدر تبيع.
اهم حاجة هنا انك تختار الدواجن المناسبة لمنطقتك يعني مثلا لو فيه مطاعم بتقدم حمام ابدأ ربي حمام، لو مطاعم بتقدم ارانب ابدأ ربي ارانب.
لكن بشكل عام الفراخ البيضاء هي المنتشرة، علشان كدا تقدر تبدأ المشروع ده وانت ضامن انك هتقدر تبيع.
حاجة كمان مميزة هنا انك تقدر تبدأ المشروع في اوضة صغيرة في البيت او فوق السطح بس اهتم بنظافة المكان.
التكلفة:
هنا هتتكلف في حاجتين اساسيتين وهما:
- شراء الكتاكيت
- العلف
فيه تكاليف تاني زي الادوية ولكن تكلفتها بسيطة.
تقدر تبدأ بـ 100 فرخة وبعدها تتوسع زي ما تحب.
مشروع تربية الدواجن برضو من افضل المشاريع المربحة في القري والتي تحدثت عنه بالفعل في موضوع سابق.
6- مشروع محل عطارة صغير
محل العطارة من المحلات المميزة التقدر تبدأها براس مال اقل من 10000.
التكلفة الاكبر هنا هتكون في الغالب ايجار المحل، وبالتالي لو عندك محل ربع تكلفة المشروع تقدر توفرها.
ابدأ دايما بكميات بسيطة من كل نوع وبمجرد نمو مشروعك تقدر تطور وتبيع بالجملة.
مهم جدا كمان تقدر توصل لتجار الجملة في منطقتك وتاخد الخامات بأسعار قليلة.
نصيحة: لو فيه محل عطارة تاني في منطقتك حاول تبقي مختلف عنه وتكون علاقات كويسة مع الناس علشان ده الهيساعدك تبيع بشكل اكتر.
7- مشروع وكالة دعاية واعلان محلية
بعد فترة كورونا بدأت معظم الانشطة التجارية انظارها تتحول للبيع اون لاين.
ودي فرصة ممتازة لاي حد بيفكر!!!
هنا انت مش هتحتاج اكتر من 2000 جنيه تاخد بيهم كورس تتعلم ازاي تعمل حملات اعلانية.
وبعد كدا؟؟؟؟
كل العليك انك تنزل تتكلم مع المحلات في منطقتك وتعرض عليهم انك تزود العملاء للمحل بتاعهم.
اصعب جزء هنا هو التواصل مع العملاء ومحاولة اقناعهم، علشان كدا محتاج تعرف كويس جدا انت هتقدم ايه وهتقدر تساعدهم ازاي، لان ده هيساعدك جدا انك تجيب اول عملاء ليك.
بعد كل عميل الموضوع هيبقي اسهل كل مرة.
ملحوظة: مهم جدا تبدأ تعرض علي صفحة خاصة بيك وبأسم البيزنس بتاعك نتائج العملاء التانيين ال اشتغلوا معاك.
8- مشروع محل ترزي
الترزي شغال طول السنة.
هو مش مشروع موسمي وفنفس الوقت مربح جدا جدا.
لكن اكيد دي مهارة ومش اي حد بيعرف يعملها مظبوط؟
طيب ده كلام صح جدا، لكن مهم كمان تعرف انك ممكن تتعلم ده بكل سهولة من خلال الدورات العملية او انك تروح تشتغل مع ترزي فترة.
هنا مهم حاجتين:
- تبقي جنب محلات لبس لان ده هيساعدك بشكل كبير.
- تتخصص فاللبس الحريمي لان زي ما كلنا عارفين البنات بيشتروا اكتر.
التكلفة هنا هتكون كالاتي:
- رأس المال لشراء ماكينة الخياطة.
- سعر الدورة الهتتعلم فيها.
- ايجار محل بسيط وصغير كبداية.
لو قدرة تعمل ده هيبقي عندك مشروع ناجح ومربح جدا تقدر تعتمد عليه بربح يومي.
9- مشروع بيع الاشغال اليدوية
بنات كتيير بدأت في الشغل اليدوي ومشروعها كبر بشكل كبير.
علشان كدا تقدري لو بنت تبدأي مشروعك في الهاند ميد بمختلف انواعه.
مثلا من الحاجات البياعة بشكل كبير في مصر الشنط الجلد الطبيعي، كمان شغل التريكو.
مش بس كدا الماجات والسلاسل والخواتم برضو بياعه بشكل كبير لان الفئة المستهدفة برضو بنات.
المميز هنا ان معظم الاشغال اليدوية دي تقدري تتعلميها بسهولة من خلال يوتيوب.
كل الهتحتاجيه بعد كدا انك تعملي جروب او صفحة علي فيس بوك وتبدأي تنزلي شغل بشكل مستمر عليها.
ولو جودة شغلك كويسة هتقدري تجيبي مبيعات كويسة جدا.
المميز هنا ان الاشغال اليدوية ارباحها كويسة جدا لانك انتي البتقدري شغلك مش حد تاني.
اقرأ: فكرة مشروع براس مال 3000 جنيه ارباحها ممتازة
10- مشروع صفحة تسويق بالعمولة لمنتجات اون لاين
لو حابب فكرة تانية لمشروع براس مال 10000 جنيه او اقل بكتيير فتقدر تبدأ صفحة وتسوق بالعمولة لمنتجات موجودة فعلا لتجار.
في مصر في كتير من مواقع التسويق بالعمولة البتوفرلك منتجات تقدر تسوقلها.
عندك مثلا:
- افلييت انجزني
- سوق الجمعة
- تاجر
وغيرها من المواقع الهتلاقي عليها الالاف المنتجات التقدر تختار منها المناسب وتسوقلها ولما حد يشتري تاخد عمولة كويسة.
تاني هأكد عليك علشان تقدر تنجح في المشروع ده تحديدا لازم تعمل الاتي:
- تتعلم ازاي تعمل حملات اعلانية علي فيس بوك وانستجرام.
- تعرف تختار المنتجات الكويسة علشان تحافظ علي جودة صفحتك.
- واهم حاجة انك تتخصص في بيع منتجات محددة ( كوتشيات – ترينجات – جزم – ادوات مطبخ – الخ ).
بعد كل ده وعلشان يبقي عندك social proof والناس تثق فصفحتك زود عدد اللايكات للبيدج بتاعتك المصريين بيحبوا ده.
التكلفة بقي هتبقي ايه؟
- كورس تسويق مميز وفي الغالب هيبقي 2000 جنيه او 1000
- محتاج كمان تصرف تقريبا 1000 جنيه او 2000 اعلانات علي حسب الميزانية وانت عاوز عائد قد ايه.
المشروع ده مربح ومتجرب من ناس كتيير جدا….
فيه شخص اعرفه معرفة شخصية بيسوق تقريبا بـ 30 الف جنيه في الشهر والربح بتاعه تقريبا 25% شهريا من المبلغ بعد كل المصاريف.
يعني تقريبا 7500 جنيه مصري في الشهر.
11- مشروع مكتبة لبيع الروايات والكتب
الروايات بدأت تبقي مطلوبة بشكل كبير جدا في مجتمعنا.
لكن مش بس الروايات، الكتب كمان الخاصة بالتنمية البشرية وكتب الذكاء المالي مطلوبة برضو.
هنا المشروع بسيط جدا واي شخص يقدر يعمل منه فلوس كويسة.
خطوات المشروع وتكلفته:
- المكان ممكن يكون محل صغير جدا وممكن تستغني عنه بصفحة فيس بوك كويسة.
- تقدر تعمل اعلانات لصفحتك وتستهدف المنطقة القريبة منك.
- اهم حاجة تجيب الكتب من مكان رخيص نوعا ما.
اشهر منطقة عندنا في مصر تقدر تلاقي فيها كل الكتب ال انت محتاجها هي سور الازبكية.
سعر الكتاب في الغالب مش هيعدي 30 جنيه وتقدر تبيعه لغاية 50 او 60.
المشكلة هنا: ان الطلب علي الكتب مش ضخم هي مطلوبة بس مش بعدد كبير وعلشان كدا ارباح المشروع ممكن تكون قليلة شوية لو قارناها بارباح المشاريع التانية في القائمة هنا.
12- وظف مهاراتك في المشروع المناسب
دلوقتي كل شخص عنده مهارة غير التاني، وعلشان كدا مقدرش ابداً اقولك كل المشاريع المناسبة ليك وتتكلف 10 الاف.
بس انت تقدر فعلا توظف اي مهارة عندك وتحولها لمشروع.
يعني مثلا:
- لو بتفهم في تصليح تكييفات العربيات تقدر تبدأ ده.
- لو مهارات الكتابة عندك عالية تقدر تعمل كتاب.
- تقدر كمان لو بتعرف تبيع انك تشتغل مندوب لاي شركة.
- تقدر تبدأ مشروع متجر الكتروني وتبيع عليه منتجات.
- فيه ناس بدأت مشاريع زي الطباعة علي جرابات الموبايل والتيشرتات.
لكن لو عندك مهارة مميزة جدا، وعاوز تستغلها بطريقة صح استثمر فيها وابدأ نسقها في شكل كورس واعمل اعلانات للكورس الخاص بيك وهيبقي عندك مصدر دخل سلبي مستمر حتي لو قررت توقف شغل.
دي كانت انسب 12 فكرة مشروع مربح براس مال 10 الاف جنيه في مصر.
دلوقتي قولي….
شايف اي فكرة هي الانسب لينا في الفترة الحالية؟
ايه هنا هينجح لو بدأت بيه وايه مش هينجح مهما حاولت؟
اهم واخر نصيحة دلوقتي في موضوعنا انك تبدأ ومتتعطلش ولا تخلي حاجة توقفك عن التجربة.
عن الكاتب
شكرا جدا