ايه رأيك في دليل شامل في الربح من الانترنت في مصر لسنة 2021؟
في الحقيقة اترددت كتير قبل ما اكتب الموضوع ده وخاصة لانه باللغة العربية العامية.
ولكن بما ان الموضوع موجه في الاساس للمصريين فأعتقد انه افضل يبقي باللهجة دي.
قبل مبدأ تحضير الموضوع ده قولت لما اعرف المواقع التانية بتتكلم ازاي عن “الربح من الانترنت في مصر”.
وفي الحقيقة لقيت ان مفيش موضوع واحد بيتكلم بالتفصيل عن الموضوع ده وكلها في الحقيقة مشاركة لمجموعة من الطرق من غير اي تجارب شخصية.
وعلشان كدا قررت اكتب الدليل ده و البوعدك انه مش هيكون واحد تاني من المواضيع الموجودة في المواقع التانية.
لكن هيكون مشاركة لتجربتي بالكامل وكل حاجة اتعلمتها علي مدار 4 سنين فاتوا.
علشان كدا بتمني انك تركز معايا جدا وتخلينا نبدأ من الصفر لغاية متقدر تنجح وتتخصص في مجال معين.
مستعد نبدأ؟
الجزء الاول: مرحلة اليأس والبحث
وجودك هنا بتدور علي الموضوع ده بالتحديد معناه انك يأست من انك تلاقي وظيفة او مشروع.
او انك عاوز فلوس بسرعة لسبب معين.
لكن نسبة قليلة بس هي البتدور علشان يبدءوا Career حقيقي علي الانترنت.
وللاسف المجموعة الاخيرة بس هي البتقدر تنجح وتخلي الربح من الانترنت في مصر او اي دولة عربية تانية شغلها الاساسي ( ودي نسبة مش قليلة صدقني ).
لكن الخبر الكويس هنا هو:
ايا كان السبب في وجودك هنا في الموضوع ده تحديدا انت تقدر تحوله وتشكله علشان يتحول في النهاية الي رغبة في Career مفيش اي حدود لدخله الشهري.
لكن الخبر الهيضايق مجموعة كبيرة وهيتسبب في خروجهم من الموضوع ده ان الطريق صعب ومش سهل اطلاقا زي مهتشوف في فيديوهات اليوتيوب المنتشرة جدا.
لكن ده المفروض يكون سبب كافي لدخولك للعالم ده لسبب:
كل ما تزيد صعوبة مجال او يكون طويل المدي في العائد ده معناه ان عدد قليل جدا هو الهينجح.
وده معناه انك تقدر تعمل ال Brand بتاعك وتنافس لو نفسك طويل.
دي كانت مقدمه ملخصها:
- لو جاي علشان طرق سهلة فللاسف ده مش متاح في مصر غير لو هتستثمر وهنا هرشحلك موضوع الربح السريع من الانترنت تقدر تقراه وتحدد المناسب ليك.
- الربح من الانترنت في مصر حقيقي وعدد كبير جدا من الاشخاص بيحققوا مبالغ ضخمة جدا.
- حدد هدفك وقرر انك هتبني مشروع وبيزنس حقيقي مش جاي تلعب.
- اهم حاجة لازم تعرفها ان ( مشاهدة الاعلانات بفلوس ) مش الطريق المناسب ليك ( لاني بدأت بيه ويأست جدا صدقني ).
ودلوقتي خليني اجهزك بمجموعة ادوات هتحتاجها كشخص بيشتغل علي الانترنت في مصر.
الجزء الثاني: اهم الادوات الضرورية للربح من الانترنت في مصر
لو هتشتغل علي الطرق الهضيفها في الموضوع ده فأنت هتحتاج ادوات هي مهمة مبدئيا لكن بالتأكيد في ادوات تانية مهمة بتختلف علي حسب الطريق الهتمشي فيه في النهاية ولكن دي اكيد هتعرفها بسهولة جدا.
هنا هتلاقي ادوات مهمة هتساعدك تستلم اي فلوس هتجيلك في البداية وهي مناسبة جدا للمبتدئين.
لان دي مشكلة واجهتني كتيير جدا في البداية ومعرفتش ازاي استلم فلوسي فخليني اقولك الادوات دي ايه:
1- فيزا ايزي باي Easypay
الفيزا المفضلة الي قلبي…
مش بس لانها مش بتكلفك حاجة تقريبا ( سعرها 10 جنيه )…
لا الاهم من كدا انك ينفع تربطها باي بنك الكتروني ( هقولك علي اهم واحد منهم كمان شوية ) وتستلم فلوسك ال علي البنك ده من خلال الفيزا وتسحب من اي ATM في اي مكان في مصر وتابع لاي بنك.
خطوات الحصول علي الفيزا
- هتروح اي مكتب بريد قريب منك ومعاك صورة البطاقة والبطاقة.
- هتطلب منهم فيزا ايزي باي ( اسمها كدا ) بس لازم تأكد عليهم انها تكون ( بتقبل السحب والتعامل اون لاين ) لان حاليا فيه Visa بس للمعاشات.
- هتستلم الفيزا فنفس الوقت وانت واقف.
- بعدها هتكلم خدمة العملاء الخاصة بالبريد ( رقمهم علي الفيزا ) وهتطلب منهم تفعيل الفيزا الخاصة بيك.
- هيطلب منك بياناتك ورقم البطاقة وشوية معلومات تانية ( مش بيطلب ابدا الرقم السري للفيزا ).
- كدا الفيزا بقت مفعلة وينفع تستلم وتعمل ايداع من خلالها.
دي كانت اول حاجة ضرورية هتحتاجها وليها بديل تاني وهي فيزا خاصة ببنك اسكندرية ( Inspire ) ولكن خليك في الاسهل واختار Easypay.
2- بنك Paypal
سمعت قبل كدا عن البنوك الالكترونية؟ لو دوست علي الكلمة الفاتت دي هتعرف كل حاجة بالتفصيل عنها.
بس ما علينا….
بايبال هو اهم واشهر بنك الكتروني وال يهمنا هنا انه اكتر بنك مستخدم كوسيلة دفع في معظم المواقع علي الانترنت.
علشان كدا اي طريقة هتستخدمها واي موقع هتشتغل عليه في الغالب هيكون بيوفر البنك ده كوسيلة دفع.
الخطوات علشان تجهز حسابك بالكامل:
- في البداية هتسجل في البنك وتعمل حساب ( اتأكد ان ال Password بتاعك قوي ).
- بعد كدا هينفع تستلم فلوس عادي بس فيه خطوة مهمة علشان متحصلش اي مشاكل.
- هتحتاج تربط فيزا ايزي باي ال اشترتيها من شوية بالبنك وده سهل جدا بس في البداية هتحتاج تروح البريد بعد 24 ساعة من شراء الفيزا وتعمل ايداع ب 150 جنيه.
- بعدها هتروح تدخل علي حسابك في Paypal وتقوم تعمل حاجة اسمها ( Link a card ) او ربط بطاقة.
- هتضيف كل المعلومات الخاصة بالفيزا ( الارقام بتاعتها – ال 3 ارقام فضهر البطاقة – تاريخ انتهاء البطاقة ).
- دلوقتي Paypal هيخصم منك مبلغ بسيط من فلوسك ( تقريبا 2 دولار ) وهيطلب منك رقم العملية.
- هتروح تكلم الدعم الخاص بالبريد وتديهم معلوماتك وتطلب منهم رمز اخر عملية تمت من الفيزا لحساب Paypal.
- هتاخد الرمز وتضيفه في الخانة المطلوبة منك جوا حسابك في البنك.
وبكدا مبروك انت ربطت الفيزا بتاعتك ببنك بايبال وتقدر دلوقتي تسحب اي فلوس تجيلك علي البنك للفيزا الخاصة بيك.
لو الشرح معقد شوية ممكن تشوف شرح بنك بايبال Paypal بالصور وده هيساعدك اكتر.
اخر اداة مهمة هتحتاجها هي…
3- الحساب البنكي
في الحقيقة الحساب في البنك مش ضروري قوي كبداية لكن هتحتاجه في مرحلة من المراحل.
هتحتاجه بعد فترة بسيطة جدا لو اشتغلت بضمير.
لو اخترت بيزنس خاص بيك زي مثلا ( اليوتيوب – موقع الكتروني ) فانك يبقي عندك حساب بنكي امر ضروري.
فيه اكتر من بنك كويس في مصر.
بس المشكلة ان معظم الحسابات بتحتاج منك ايداع علي الاقل 4000 جنيه.
لو معاك المبلغ ده فممكن تبدأ ببنك مصر والبيعتبر من البنوك المناسبة في الربح من الانترنت.
بس في الحقيقة ان تجربتي مكنتش ممتازة مع البنك بسبب:
البنك مش بيبعت كشف حساب ودي كانت مشكلة بالنسبالي لاني كنت محتاج افعل حساب علي بنك الكتروني ( بنك سكريل ) وكان لازم توفير كشف حساب واضطريت اروح لغاية البنك واستخرج كشف حساب بـ 40 جنيه.
ده رغم اني دافع فعلا تكاليف كشف الحساب الهو مش بيجي اصلا.
ملحوظة اخيره في الجزء ده: متقلقش من الضرايب في بداية الطريق مفيش اي مشاكل هتواجهك الا بعد دخل شهري علي الاقل 5000 دولار وطالع وتقدر تحله ببساطة.
ابدأ بس واشتغل علي طرق مش ممنوعة في مصر.
وبكدا نكون خلصنا من الجزء التاني في طريق الربح من الانترنت في مصر وجه وقت الجزء التالت والاهم….
افضل طرق الربح من الانترنت في مصر بعد 4 سنين خبرة
اهم نصيحة قبل ما اقولك علي الطرق المجدية والمربحة جدا في مصر هي الاتي:
جرب كل طريقة من الطرق دي وحاول تتعلمها في اسبوع ولو لقيت نفسك مرتاح للمجال ده وشايف انه مناسب ليك ركز في الطريقة دي بس ومتشتتش نفسك بأي طريقة تاني.
ابدأ بعدها في تطوير نفسك في المهارة ال اخترتها واحترفها لغاية متبقي شايف نفسك فعلا كويس في الحاجة دي.
لو حابب تطبيقات دي قائمة فيها: افضل 11 تطبيق لربح المال في مصر
1- الكتابة
بعد 4 سنين من التدوير اقدر اقولك وبكل ثقة ان الكتابة من اكثر مجالات الربح من الانترنت في مصر وخارج مصر من حيث الطلب.
اكيد كل مهارة ليها جمهورها وليها الاشخاص البيطلبوها لكن خليني اتكلم عن كتابة المحتوي لانه المجال الجربته فعلا.
تقريبا 1000 دولار كان مجموع ارباحي من كتابة المقالات لحساب اشخاص تانية قبل مبدأ مدوناتي الخاصة والحققت منها ارباح اضعاف المبلغ ده.
وده مثال لارباح استلمتها بالفعل من مواقع الفريلانسر ( ال اهمهم خمسات ومستقل ):
لكن….
في الحقيقة ده مكنش فخلال يوم او شهر انا فضلت مستني علي منصة خمسات ان شخص واحد يطلب مني خدمة كتابة مقالات تقريبا 3 شهور تقريبا فضلت اطور من نفسي فمجال الكتابة فيهم وبدأت مدونة مجانية خاصة بيا وقولت استغل الوقت ده لحساب نفسي.
لغاية ما كان فيه شخص طلب كتاب محتوي في جزء في الموقع اسمه ( الخدمات غير الموجودة ) واقنعته اني الشخص المناسب فطلب مني الخدمة اول مرة.
وهنا بدأت سلسلة ارباح متواصله من الخدمات المختلفة علي خمسات ( اقرا الشرح الكامل للموقع ).
طيب ازاي تقدر تبدأ في المجال ده؟
اقرأ دليل الربح من كتابة المقالات فيه شاركت خلاصة تجربتي بالكامل وكل حاجة مبدئية هتحتاجها في المجال ده.
فيه كمان دليل شاركت فيه 5 طرق للحصول علي وظائف كتابة على برنامج Microsoft word لو شايف ان المقالات مجال صعب.
ودلوقتي خلينا نشوف طريقة تاني من طرق الربح من الانترنت في مصر والمناسبة جدا للمصريين.
2- اشتغل علي مدونتك الخاصة
المدونات من احسن طرق الربح من الانترنت في مصر وفي العام.
ده لان فيها ميزة مش موجودة فمعظم الطرق وهي انها بتوفر ليك Passive Income او بالعربي الدخل السلبي.
بتشتغل علي المدونة لفترة ولو شغال عليها صح بتبقي عبارة عن الفرخة البتبيض دهب.
هتفضل توفرلك دخل يوميا حتي بعد متوقف شغل عليها.
لكن ده في الاساس بيعتمد علي مصدر الزوار الهيدخلوا موقعك علشان كدا بقولك لو هتبدأ مدونة خاصة بيك اتعلم اساسيات السيو ( وده هيساعدك تجيب زيارات من جوجل لما يبحثوا عن كلمة معينة زي الربح من الانترنت في مصر ال انت جيت منها للموضوع ده ).
ولكن…..
مش معني انها احسن طريقة انها سهلة!!!
المدونات اصعب طريقة تقدر تعمل منها دخل علي الانترنت وده بيرجع في الاساس لانها اكتر مجال ارباحه بطيئة.
علشان كدا معظم البيبدءوا مش بيقدروا يكملوا وبيزهقوا.
انا فاكر اول دخل ليا من اول مدونة عملتها كان 126 دولار. ودول قدرت اجمعهم بعد سنة شغل لكن بعدها بقي ضعف المبلغ تقريبا بيجي بشكل شهري.
خليني اشجعك واوريك شوية ارباح من شوية مدونات
ارباح التسويق بالعمولة لموقع علي المدونة دي لموقع ysense ( الخاص بالربح من الاستطلاعات )
ارباح واحد من المدونين الذين اتابعهم من الاعلانات ( تقريبا 100 الف دولار شهريا )
دي ارباح الاعلانات البيعرضها علي مدونته
ودلوقتي عاوز تبدأ في الطريقة دي؟
حبيت اسهل الموضوع علي اي شخص عاوز يبدأ وعملت دليل ( كيفية انشاء مدونة والربح منها ) ابدأ بيه ولو واجهتك اي مشكلة اتواصل معايا علي فيس بوك او من خلال التعليقات هنا وهحاول اساعدك علي قد مقدر.
ملحوظة: المدونة بتتكلف تقريبا 50 دولار لمدة سنة يعني تقريبا 60 في الشهر يعني 2 جنيه في اليوم لو مش معاك المبلغ ده متبدأش بس نصيحتي انك تبدأ دلوقتي وكأنك دخلت جمعية هتقبضها الاخير.
لانك هتشوف ارباحك بعد 8 شهور وال فالغالب هتكون 100 دولار في الشهر اقل حاجة يعني العائد علي الاستثمار 400/50 ( 800 % في السنة ).
ايه رأيك تبدأ: شغل اون لاين بالدولار؟ ( اقرا الدليل ده هتستفيد منه )
3- اتعلم تصميم فيديو
مبيعات خدمات الفيديو علي مواقع الفريلانسر ضخمة جدا.
حتي لو مش منتشرة بشكل ضخم علي المنصات العربية فليها مشترين بالالاف علي المواقع الاجنبية.
علي سبيل المثال:
قناة اليوتيوب الخاصة بيا انا بشتريلها فيديوهات من علياء.
واكيد فيه مليون شخص تاني بيشتروا فيديوهات يوتيوب.
طب ايه اهم انواع الفيديوهات المطلوبة علشان تتعلمها؟
فيه اكتر من نوع مرغوب اهمهم مثلا:
- فيديوهات الموشن جرافيك ( اسعارها جبارة ).
- ال White board ( فيه برامج كتيير بتعمل ده اهمها Vidscribe ).
- فيديوهات تصوير الشاشة.
- الفيديوهات زي ( افضل 10 ) عبارة عن مقاطع فيديوهات من غير حقوق بيتم تركيبها لعمل فيديو.
البنصح بيه بشدة انك تبدأ تتعلم ( موشن جرافيك – وايت بورد ) لان اسعارهم ممتازة جدا.
دي كانت مثلة لاسعار الدقيقة من فيديو ال whiteboard علشان كدا نصحتك تبدأ تتعلمه وتبيع مهارتك علي موقع Fiverr الموجود في الصورة.
تعالي دلوقتي نتكلم عن طريقة تانية للربح من الانترنت في مصر واتشهرت جدا في الفترات الاخيرة وهي….
4- قنوات اليوتيوب
فيه تقريبا اكتر من مليون قناة يوتيوب مصرية بدأت الفترة الاخيرة.
وده في الحقيقة امر طبيعي بعد انتشار ارباح قنوات اليوتيوب للعلن ( ممكن تشوف الدراسة العملناها والبتتقول ان متوسط الربح من كل 1000 مشاهدة علي اليوتيوب 1.5 دولار ).
الفترة الاخيرة اتكلمنا بالتفصيل عن اليوتيوب في كورس اليوتيوب المجاني الخاص بينا ( والبنصحك بشدة انك تقراه وتفهمه قبل متبدأ القناة بتاعتك ).
في الدليل ده هتلاقي كل حاجة ممكن تتعلمها من الصفر.
لكن اهم موضوع محتاجك تركز عليه هو الكلمات المفتاحية لليوتيوب لان ده هيساعدك تخلي فيديوهاتك تظهر لاشخاص كتير عند البحث علي اي كلمة في الفيديوهات بتاعتك.
مش عاوز اكتر عليك في الجزء ده لاننا عندنا اجزاء كتير والجزء ده تحديديا فيه موضوعات كتيير عندنا بتشرح كل جزء فيه.
5- انستجرام
في مصر مفيش اي فرص انك تعمل فلوس من انستجرام لو هتستهدف مصريين.
الا طبعا لو بقيت ( او بقيتي وده اكتر ) انفلونسر وبدأت في الاعلان للبراندات الكبيرة.
لكن ال انا اقصده غير كدا خالص.
- انت هتعمل اكونت علي انستجرام.
- بس المجال مش هتنزل فيه صورك ولا صور فنانين وتكبره لا.
- انت هتحدد مجال معين تشتغل عليه ( الفتنس – المال والاعمال – التسويق – الشعر – البشرة – العربيات – الخ ).
- لو قدرت تخليه بالانجليزي يبقي حاجة عظيمة لو بالعربي برضو هتقدر تعمل فلوس منه.
- دلوقتي هنبدأ نكبر الحساب بتاعنا بشوية طرق اهمها ( الاعلانات المدفوعة عند الحسابات التانية فنفس المجال – واهم الهاشتاجات في النيتش ال اخترته ) وانستجرام هيقوم بالباقي ويبدأ يوصلك لناس اكتر واكتر مهتمة حتي من غير متدفع اي فلوس ( هو ذكي جدا في الحتة دي وانت اكيد لاحظتها )
- متنساش انت لازم تنزل كل يوم علي الاقل مرتين ( استوري – صورة عادية ).
دلوقتي الحساب بتاعنا وصل 50 الف متابع ( لو زاد شوية هتعمل منه فلوس كويسه جدا ) بس نقدر دلوقتي نبدأ في استغلاله:
- هنحط في البيو الخاص بينا انه متاح الاعلانات ( دي الطريقة الاسهل علشان تعرف الناس انك بتقبل اعلانات ).
- هنروح لموقع زي خمسات ( وممكن تشوف شرح الموقع بالكامل قبل ما تبدأ ) ونقدم خدمة اسمها الاعلانات علي حسابات انستجرام (ودي من الخدمات المرغوبة جدا في دول الخليج ).
- الطريقة التالتة اننا نعمل نبعت الزوار للمدونة الخاصة بينا من خلال الاستوري ( Swipe up ) ومنها نقدر نعمل مبلغ كويس من الاعلانات علي المدونة.
- لو كان الحساب اجنبي فممكن تبيعه علي موقع Social tradia بمبلغ كويس جدا بيعتمد علي عدد المتابعين ( لو 50 الف ومتفاعل منهم نسبة كبيرة ) ممكن يوصل ل 1000 دولار ( 15 الف جنيه )
لو كنت محتاج معلومات وطرق اكتر عن انستجرام تقدر تقرا: الدليل الشامل للربح من انستقرام.
تحب نتكلم عن مجال تاني للربح من الانترنت في مصر ولا كفاية؟
في الحقيقة هو فيه طريقتين بحبهم جدا برضو ممكن يبقوا مصدر دخل ممتاز ليك في مصر لكن هيحتاجوا منك دراسة كتيير وواستثمار علي الاقل 2000 – 3000 جنيه.
فانا هضيفهم للموضوع هنا لو لقيت عدد كبير مهتم هضيفهم.
لو مهتم تعرف سبلي كومنت علشان ده بيشجعني جدا.
واخيرا…..
فرص الاون لاين كتيير جدا وفي الحقيقة محدش يقدر يتقن كل حاجة.
علشان كدا لو فاكر قولتلك جرب كل حاجة اسبوع علي الاقل والهتلاقي شغفك فيه كمل فيه.
دلوقتي خلينا نتكلم عن اخر جزء في الموضوع واللازم اضيفه وهو…
ما بعد الربح من الانترنت في مصر
فيه غلطة الكتير مننا بيقع فيها وانا قصرت فيها جدا في البداية لكن دلوقتي الحمدلله خفت جدا واتمني انك متقعش فيها وهي…
الخوف من الاستثمار.
بعد متبقي قادر تجيب فلوس كويسة ( او حتي قليلة من الطريق المشيت فيه ) من الضروري انك تعيد تدويرها في نفس الطريق.
مش بقولك تستثمر في حاجة تانية غير شغفك والبقي ليك قصة نجاح فيه.
لا…
كل ال اقصده انك تبدأ تريح نفسك.
يعني ايه؟
يعني لو:
- اخترت المدونات كطريقتك المفضلة استثمر جزء كبير من دخلك منها في تعيين كتاب محتوي بدل متكتب كل المحتوي بنفسك وركز في حاجات تانية.
- لو مثلا اخترت انستجرام وفعلا قدرت تبيع اول حساب ليك وحاليا عندك حساب تاني دور علي مصممين صور واستثمر في وقتك الممكن تستغله فتعلم مهارة جديدة وتنوع دخلك.
وهكذا فكل حاجة تقرر تبدأ فيها وتلاقي العائد بتاعها ابتدي.
طريقتي في اعادة تدوير رأس المال كالاتي:
- 40 % من صافي الدخل يعاد استثماره.
- 20 % للادخار.
- 40 % مستلزمات الحياة والمصاريف الشخصية.
دي مش احسن نسب او توزيعة لكن دي كانت الانسب ليا.
حاول تناسب دخلك مع اسلوب معيشتك بس متنساش ابدا تستثمر جزء وتوفر علي نفس وقت.
دلوقتي دورك تبدأ….
متستناش قرر دلوقتي ايه الطريقة الحاسس انها مناسبة ليك اكتر وابدأ جربها الاول.
والاهم من كدا انك تعمل شير للموضوع مع ناس تانية علشان يستفيدوا ( بدأت اشوف دخل كويس لما بدأت افيد غيري بمعظم المعلومات العندي ).
فشارك ولو عندك اي استفسار او عاوز حد يساعدك متترددش تكلمني علي صفحتنا علي فيس بوك.
عن الكاتب
